श्रीमन् महासाधू श्री मोरया गोसावी महाराजांना श्री मंगलमूर्तींची प्राप्ती झाल्यानंतर ते फक्त भाद्रपद व माघ महिन्यात यात्रा करू लागले. ही यात्रा आजतागायत सुरु आहे. भाद्रपद शुद्ध प्रतिपदेला सकाळी पूजा नैवेद्य झाल्यावर श्रीमंगलमूर्तींची पालखी चिंचवडहून वाजत गाजत मोरगावला जाण्यासाठी निघते. पालखी प्रथम श्रीमोरया गोसावींच्या समाधी मंदिरात येते तेथे त्यांची प्रार्थना करून डाळीचा प्रसाद वाटतात. नंतर सर्व मंडळी गावाबाहेर देवघर सोसायटीजवळ जाऊन उभी राहतात. तेथे पुन्हा डाळीचा प्रसाद वाटला जातो.

          पालखीचा पहिला मुक्काम पुणे येथे होतो. तेथे तळेगावकर दाभाडे यांच्याकडून किनखाबी पताका व पूजासामग्री येत असे. पालखीचा दुसरा मुक्काम सासवड येथे होतो. जेजुरी येथे पूजा-अर्चा नैवेद्य करून तिसऱ्या दिवशी (तृतीयेस) रात्री पालखी मोरगावी पोहचते. मोरगावकर छबिना घेऊन श्रींच्या पालखीस सामोरे येतात, यावेळी श्री देव महाराज श्री मंगलमूर्तींना गळ्यात धारण करतात. यावेळी सर्वाना श्रींचा ओलांडा मिळतो, व गावकरी श्रींना मोठ्या थाटाने गावात मिरवीत मंदिरात घेऊन जातात. मिरवणुकीने येऊन श्री मंगलमूर्ती व श्री मयुरेश्वर यांची भेट होते. धूळदर्शन वगैरे झाल्यावर श्रींना ओवरीत ठेवतात.

           चतुर्थीला कऱ्हा नदीमध्ये श्रीमंगलमूर्तींना स्नानासाठी नेतात. श्री मंगलमूर्तींच्या स्नानाचे तीर्थ श्री देव महाराज सर्व भक्तांच्या अंगावर शिंपडतात. भक्तही कऱ्हेत स्नान करुन ओलेत्याने ते अंगावर घेण्यात धन्यता मानतात. यानंतर मयूरेश्वराच्या मूर्तीसह श्रीमंगलमूर्तींची महापूजा होते. त्या वेळी धोतरजोड़ा व महादक्षिणा श्रींच्या चरणी अर्पण करतात. नंतर महानैवेद्य होऊन सर्वांस प्रसाद वाटप होते. रात्री मयुरेश्वराच्या समोरच्या मंडपात मोठ्या धुपारतीचे गायन केले जाते. त्या वेळी नित्याची एकवीस पदे म्हटली जातात. धूपारती झाल्यावर सर्वांना डाळीची खिरापत वाटतात.

          पंचमीच्या दिवशी सकाळी ओवरीत ठेवलेल्या श्रीमंगलमूर्तीपुढे धुपारती व टिपऱ्यांचा खेळ होतो. सिद्धिबुद्धिसहित श्रीमंगलमूर्तीस पालखीत घालून नदीच्या पलीकडे पवळीत नेतात. पंचमीला श्रीस्वारी देवस्थानच्या वाड्यात नेतात. तेथे पूजा नैवेद्य होऊन सर्वांना भोजन प्रसाद मिळतो. आजूबाजूच्या गावातून हजारो भक्त प्रसाद घेण्यासाठी येतात. हा समारंभ फारच प्रेक्षणीय असतो.

          श्रीमंगलमूर्तींची स्वारी षष्ठीस मोरगावहून निघते. येताना षष्ठीस जेजूरीचे खंडेराय व सप्तमीस शिवरीची यमाई या देवांची दर्शने श्रीमंगलमूर्तीस पुढे ठेवून घेतात. सप्तमीस सासवड येथे श्रीनारायणमहाराज ( थोरले) यांची पुण्यतिथि साजरी होते. तेथून पुण्यास मुक्काम करून श्रीमंगलमूर्ती दशमीस रात्री चिंचवड येथे जातात. या यात्रेत दशमीस चिंचवड येथे परत पोहोचावे लागते. पालखी चिंचवडजवळ येताच गावकरी मंडळी श्रीमंगलमूर्तीस वाजत गाजत गावात आणतात. जाता येता ठिकठिकाणी स्थानिक लोक पालखीचा सत्कार करतात.